Продукцияны сырьё катары эмес, кайра иштетүү аркылуу сата турган болсок наркы 200 пайызга жогору болот. Мындай пикирин Бактыгүл Аскералиева Sputnik Кыргызстан радиосунун эфиринде маек учурунда билдирди.
Анын айтымында, айыл чарбасында химикаттарды аз колдонуу аркылуу өндүрүшкө басым жасалып, дары чөптөрдү, органикалык өсүмдүктөрдү өстүрүүдө дыйкандар колдоо тапса жакшы жыйынтык болот.
"Мисалы, "Арстанбап" токоюндагы жаңгактарды, өрүктү кургатып экспорттоп жатабыз. Мындан тышкары, дары чөптөрдү да сатуудабыз. Учурда Ысык-Көлдүн тегерегинде бир топ дары чөптөр өстүрүлүп, билишимче, европалык компанияларга кетет. Демек, чет өлкөдөн суроо-талап болуп жаткандыктан биз ошол тармакты өнүктүрүүнү колго алышыбыз керек. Органикалык продукция өндүрүүдө Кыргызстандын потенциалы абдан чоң. Продукцияны сырьё катары эмес, кайра иштетүү аркылуу сата турган болсок наркы 200 пайызга жогору болот. Бул экономиканын өсүшүнө жакшы салым болмок. Ысык-Көл биосфералык аймак деп кабыл алыныптыр. Ага байланыштуу 10-20 жылдык стратегиялык план түзүп, химикаттардын колдонулушун азайтуу керек. Табигый өсүмдүктөрдү өстүрүп, атайын жеңилдиктерди карап, бул багытта окутуу жүрсө айыл чарбаны тез арада жакшы деңгээлге көтөрө алабыз", — деди Аскералиева.
Ошондой эле агроном органикалык өсүмдүктөрдү өстүрүүдө өлкөнүн климаттык шарты ыңгайлуу экендигин кошумчалады.