БИШКЕК, 16-апр. — Sputnik. Россиядагы Гамалея атындагы илим-изилдөө борборунун вирусологу, профессор Анатолий Альтштейн "360" телеканалына КР Саламаттык сактоо министрлигинин COVID-19га каршы "Ысык-Көл тамырын" пайдалануу боюнча сунушуна пикирин билдирди.
Анын айтымында, коронавирусту бул же тигил каражат менен дарыласа болорун клиникалык изилдөөдөн кийин гана айтууга болот.
"Бизде пайдаланса болот делген каражаттар толтура. Эгер дарыгерлер кайсы бир препаратка ишенип жатса, аны клиникалык сыноодон өткөрүп көрүү керек. Ага чейин эч нерсе айта албайбыз", — деди адис.
Вирусолог кошумчалагандай, элдик медицинада ар кандай каражаттар колдонула берет. Бирок аларды изилдеп көргөн мисалдар аз.
Уу коргошун чуусу
Буга чейин президент Садыр Жапаров Кыргызстандын дарыгерлери коронавирустан 2-3 күндө айыктырган ыкма тапканын айткан. Көп өтпөй социалдык тармактагы баракчасына он чакты киши атайын аппараттын жардамы менен бөтөлкөлөргө саргыч түстөгү суюктукту куюп жаткан видео жарыялаган. Анда бөтөлкөлөрдүн сыртында "Уу коргошун" жана "Иссык-Кульский корень" деген жазуулар бар экенин көрүүгө болот.
Дүйнөлүк саламаттык сактоо уюмунун Кыргызстандагы өкүлчүлүгүнүн башчысы Назира Артыкованын Kaktus Media порталына билдиргенине караганда, "Ысык-Көл тамырынын" кайнатмасы менен коронавирусту дарыласа болот деп ойлоо туура эмес.
Журналисттин "Сөз болуп жаткан кайнатма менен коронавирустан арылса болобу?" деген суроосуна ал: "Мүмкүн эмес. Бардык жерде илимий далил керек", - деп жооп берди.
Ал эми далилдүү медицина боюнча адис Бермет Барыктабасова "Ысык-Көл тамыры" Кыргызстандагы эң уулуу чөп экенин айтып, анын кайнатмасын пайдалануу элдин саламаттыгына коркунуч жаратарын билдирген.