БИШКЕК, 14-апр. — Sputnik. Бишкекте жиу-житсу боюнча Кыргызстандын чемпионаты жыйынтыкталып, жеңүүчүлөр аныкталды. Бул тууралуу аталган федерациянын президенти Абдурахманхаджи Муртазалиев билдирди.
Мелдеш Бишкектеги Кожомкул атындагы спорт сарайында өтүп, ага аймактардан жана шаарлардан келген 300дөн ашык жиу-житсучу катышты.
Өлкө чемпионаты чоңдор, жаштар, өспүрүмдөр арасында өткөрүлүп, кыздар жана балдар күч сынашты. Ар биринде бир нече салмак категориясы каралган.
Жеңүүчүлөр жана байге ээлери медаль жана дипломдор менен сыйланды. Федерация президенти белгилегендей, турнирдин жыйынтыгы менен эл аралык мелдештерге бара турчу командалар куралат.