БИШКЕК, 13-апр. — Sputnik. Прокуратура саясатчылар Өмүрбек Текебаев менен Дүйшөнкул Чотоновго айып тагуудан баш тартты. Бул туурасында Башкы прокуратуранын маалымат кызматы билдирди.
Саясатчылардын жазык иши бүгүн, 13-апрелде, Бишкек шаарынын Биринчи май райондук сотунда каралууда.
"Сотто жарыш сөздүн жүрүшүндө прокуратура Өмүрбек Текебаевге жана Дүйшөнкул Чотоновго карата алардын күнөөлөрү далилденбегендиктен мамлекеттик айыптоону колдоодон баш тартты", — деп айтылат маалыматта.
Текебаевдин иши
2017-жылдын 25-февралында Башкы прокуратура "Ата Мекен" партиясынын лидери Өмүрбек Текебаев жана мурдагы өзгөчө кырдаалдар министри Дүйшөнкул Чотоновго карата Кылмыш-жаза кодексинин 303-беренесинин 1-бөлүмү ("Коррупция") жана 166-беренесинин 4-бөлүмүнүн 2-3-пунктуларында ("Алдамчылык") камтылган белгилер боюнча кылмыш ишин козгогон.
Ал иштин алкагында Текебаев менен Чотонов кармалган. Россиялык бизнесмен Леонид Маевский Текебаев "Альфа Телеком" (Megacom) компаниясынын башкармалыгына кирүүгө мүмкүнчүлүк берүү үчүн бир миллион доллар алды деп айтып, депутаттын үстүнөн арыз жазган. 16-августта Бишкек шаарынын Биринчи май райондук соту Текебаевди коррупция боюнча күнөөлүү деп таап, сегиз жылга эркинен ажыраткан. Шаардык сот жана Жогорку сот өкүмдү күчүндө калтырган.
Кийин жаңы жагдайлардан улам Текебаев менен Чотоновдун ишин Жогорку сот кайра кароого жөнөтүп, Фемида өкүлдөрү өткөн жылдын 29-августунда эки саясатчыны үй камагына коё берген. Мындан улам иш кайра башынан Биринчи май райондук сотунда каралып жатат.