БИШКЕК, 13-апр. — Sputnik. Президенттин Жогорку Кеңештеги мурдагы өкүлү Курманбек Дыйканбаев УКМКнын тергөө абагынан бошотулду. Бул тууралуу Биринчи май райондук сотунан билдиришти.
Анын баш коргоо чарасы кайра каралып, 24-майга чейин үй камагына чыгарылды.
Дыйканбаев 2020-жылдын ноябрь айында кызматтык абалын кыянаттык менен пайдаланууга шектелип кармалган. Кийин УКМКнын тергөө абагына киргизилген.
Тергөөнүн версиясы боюнча, Дыйканбаев октябрдагы парламенттик шайлоо өнөктүгү маалында стратегиялык маанидеги мамлекеттик ишкананын башчысын бир партиянын кызыкчылыгы үчүн 7 миллион сом берүүгө мажбурлаган. Эгер баш тарта турган болсо, кызматтан кетирерин айтып коркутканы аныкталган.
Дыйканбаев 2020-жылдагы парламенттик шайлоого "Биримдик" партиясы менен катышкан (тизмеде №58 болгон). Шайлоо алдындагы кампания учурунда анын ыйгарым укуктары токтотулган. Ал эми камакка алынгандан кийин жумушунан бошотулган. Дыйканбаев Сооронбай Жээнбековдун парламенттеги өкүлү болчу.