БИШКЕК, 11-апр. — Sputnik. Россиянын үч шаарында "Кыргыз Республикасынын Конституциясы жөнүндө" мыйзамынын долбооруна добуш берүү аяктады. Бул тууралуу КРдин РФтеги элчилиги билдирди.
Ага ылайык, Түштүк Сахалин шаарындагы № 9013, Владивостоктогу № 9004 жана Иркутск шаарындагы № 9007 шайлоо участкаларында добуш берип бүтүштү.
Россиянын эң алыскы аймактарында жашаган өлкө жарандарына жалпы элдик добуш берүү аркылуу өз тандоосун билдирүү мүмкүнчүлүгү берилген.
Добуш берүү мыйзамдын талаптарына ылайык жана бардык санитардык эрежелер сакталган шартта өткөрүлгөнү кошумчаланды.
Чет жакта 48 шайлоо участкасы ачылды. Тизмеде 58 598 жаран катталган.