БИШКЕК, 11-апр. — Sputnik. Европанын Мальта Республикасы туризм тармагын жандандыруу үчүн өлкөдө жок дегенде үч күн болгон ар бир чет элдикке 200 еврого чейин сый акы берүүгө даяр. Бул тууралуу Reuters агенттигине шилтеме берип РИА Новости жазды.
Туризм министри Клейтон Бартолонун айтымында, Мальта 1-июндан тарта коронавируска байланыштуу киргизилген чектөөлөрдүн көпчүлүгүн токтотуп, жай айларына мейманканалардан орун брондогон туристтерге акча төлөй баштайт.
Тагыраагы, беш жылдыздуу мейманканадан орун брондогон туристке 200 евро төлөнсө (20 миң сомдун тегереги — ред.), төрт жылдыздуу конок үйүнө токтогондор 150 евролуу болушат. Ал эми үч жылдыздуу мейканкага жайгашкандар 100 евро сый акы алышат.
Маалыматка караганда, туризм өлкө экономикасынын төрттөн бир бөлүгүн түзөт. Пандемиядан улам бул тармак токтоп калып, элдин турмушуна бир топ терс таасирин тийгизүүдө.