БИШКЕК, 10-апр. — Sputnik. Чүй облусуна караштуу Аламүдүн райондук милициясынын тергөөчүсү Д.Б. 2000 доллар пара алууга шектелип кармалды. Бул тууралуу УКМКнын маалымат кызматы билдирди.
УКМК тергөөчүнү ИИМдин ички иликтөө кызматы менен биргеликте колго түшүргөн.
"М. уулу Т. аттуу адамга карата иш козголгон. Тергөөчү Д. Б. ага моралдык-психологиялык кысым көрсөтүү менен сотко чейинки өндүрүштү токтотуу үчүн шектүүдөн 2000 доллар алган. Кийин опузалап талап кылуу фактысы ачыкталып кетишинен кооптонуп М. уулу Т. аттуу жаранга 1500 долларын кайтарып берген. Ал калган 500 долларын берип жаткан учурда кармалды", — деп айтылат маалыматта.
Аталган материал Жазык кодексинин 326-беренесинин 1-бөлүмү ("Опузалап пара алуу") боюнча Кылмыш жана жоруктардын бирдиктүү реестрине катталган.
Кармалган тергөөчү УКМКнын убактылуу кармоочу жайына киргизилди.
Учурда тиешелүү ыкчам-тергөө иштери жүргүзүлүүдө.