БИШКЕК, 8-апр. — Sputnik. Кыргыз футболдук союзунун (КФС) президенти Канатбек Маматов Дүйнөлүк футбол уюмуна (ФИФА) ар кандай бизнес-долбоорлорду колдоону сунуштады. Бул тууралуу КФСтин маалымат кызматы билдирди.
Маматовдун белгилешинче, коронавирус пандемиясы өлкөлөрдүн футболуна да кедергисин тийгизип жатат. Илдет дагы деле басаңдай элек. Мындан улам мамлекет ичинде да, АФК сыяктуу эл аралык институттарда да футболду каржылоо көйгөйү жаралууда.
"Бул абал бир канча жылга созулса, анда ушундай эле көйгөйгө ФИФА да кабылышы мүмкүн. Анда мамлекеттик бюджети чектелүү Кыргызстанга окшогон өлкөлөр үчүн чоң кыйынчылык жаралат. Мындайлар дүйнөдө көп. Ошондуктан ФИФА жана АФК уюмуна кайрылып, футболдук ассоциацияларга кошумча каржылык булагын түзүүгө жардам берүүнү сунуштайм. Мисалы, ФИФА COVID-19га байланышкан маселелерди чечүүгө пайызсыз насыяларды берүүгө даяр. Бирок айрым ассоциациялар аны кайтара албай калышы мүмкүн. Ошондуктан ФИФА мындай насыянын жардамы менен каржы булагын түзүү идеясы бар тараптардын бизнес-долбоорлорун колдоого алуусу керек", — деген Канатбек Маматов.
Белгилей кетсек, отурумда АКФнын аткаруу комитети уюмдун 2021-жылга карата финансылык абалы тууралуу маалыматын укту.