БИШКЕК, 3-апр. — Sputnik. Мамлекет башчы Садыр Жапаров бүгүн, 3-апрелде, Баткен облусунун Баткен шаарында өнөр жай, соода жана логистикалык аймакта жайгашкан ишканалардын курулушу боюнча долбоор менен таанышты. Бул тууралуу президенттин маалымат кызматынан билдиришти.
Садыр Жапаров жергиликтүү тургундар менен баарлашып, алардын көйгөйлүү маселелерин угуп, элди кызыктырган суроолорго жооп берген
Президент жеңилдетилген ипотекалык насыянын жеткиликтүүлүгүн жана дыйкандар менен чакан жана орто ишкерлерге жеңилдетилген насыянын көлөмүн көбөйтүү маселелерин жеке көзөмөлүнө алганын белгилеген.
"Бүгүнкү күндө өнөр жай аймагына жаңы ишканаларды ачуу үчүн 19 жеке ишкерден арыз келип түшкөн. Жакынкы жылдары 28 жаңы ишкана ачуу пландаштырылууда, анда эки миңден ашуун жумуш орду түзүлөт. Учурда жер тилкелери бөлүнүп берилүүдө жана текстиль фабрикасы, өрүктү кайра иштетүүчү фабрика, касапкана, 1000 тонна мөмө-жемиш сактоочу логистикалык борбор, таш майдалоочу цехтин курулушу жүрүп жатат.
Жакынкы айларда дагы бир нече ишкананын курулушу башталат. 2021-жылдын соңуна чейин пахта майын жана желим идиштерди өндүрүүчү цех, сүттү кайра иштетүүчү завод, биогумус өндүрө турган ишкана куруу боюнча бир катар долбоорлорду ишке ашыруу пландаштырылууда", — деп айтылат маалымат кызматтын билдирүүсүндө.
Баткен шаардык мэриясы өнөр жай зонасына электр кубаты жана суу менен камсыздоо түйүндөрүн жеткирүү, ошондой эле жол салуу менен коммуникация маселелерин чечүүнүн үстүндө иштеп жаткандыгы белгиленди.
Жапаров чакан жана орто бизнеске дем берүү жана ата мекендик өндүрүүчүлөрдүн атаандаштыкка жөндөмдүүлүгүн арттыруу үчүн жеңилдетилген ставка менен узак мөөнөттүү пайызсыз насыяларды берүү пландаштырылып жатканын айткан. Ал ошондой эле жергиликтүү бийликке жерди трансформациялоо укугун өткөрүп берүү боюнча пландар жөнүндө айтып берди, жергиликтүү бийликке бул багытта ыкчам чара көрүү мүмкүнчүлүгү түзүлөрүн кошумчалаган.