Тарыхка кайрылсак, хижама 2000 жыл мурда 143-182-жылдары кытай элинде колдонулган. Анын бир нече түрү бар. Ал эми медицинада флеботомия, капилляротерапия, кан алдыруу ыкмалары колдонулат. Бул тууралуу Толкун Исаева Sputnik Кыргызстан радиосунун эфиринде маек куруп жатып билдирди.
Анын айтымында, коронавирус кан алдыруу аркылуу организмден чыкпайт.
"Мага коронавирус күчөп турган учурда хижама жасаткан бейтаптар келип жатты. Менин практикамда андан бейтап сакайып кеткенин көргөн жокмун. Дарыгер катары дал ушул кан алдыруу ыкмасы аркылуу дарылоого каршымын. Негизи хижама боюнча тастыкталган медициналык көрсөтмө жок. Алсак, Американын тамак-аш жана дары-дармектин сапатын санитардык көзөмөлдөө агенттиги миллиондогон изилдөөлөрдү жасайт. Ал кайсы бир ыкма же дарыдан бейтап канча пайыз жакшы натыйжа алды, ал канчалык таасир эткенин тастыктап чыгышат. Бул сыяктуу агенттиктер хижаманын организмге таасирин изилдеп, оорулууларды дарыласа болорун аныкташкан эмес. Рибонуклеин кислотасын алып жүргөн вирустар клетканын ичине кирип ошол жакта жашайт, ал эч кайда кетпейт. Адам вирусту алып жүрүүчү болуп кала берет. Ошондуктан коронавирус кан сордуруу аркылуу организмден чыкпайт. Кан басымы жогору, кант диабети менен ооруган адам туура жашоо образын карманса эле жакшы болуп кетет", – деди Исаева.
Дарыгер кайсы гана оору болбосун үй-бүлөлүк дарыгерлерге кайрылып алардын көрсөтмөлөрүнө ылайык дарыланууну сунуштады.