БИШКЕК, 26-мар. — Sputnik. Кыргыз-өзбек чек арасына тиешелүү маселе чечилип жатканда бир дагы кыргызстандыктын мүлкүнө зыян келтирилген жок. Бул тууралуу Улуттук коопсуздук мамлекеттик комитетинин төрагасы Камчыбек Ташиев билдирди.
Эске салсак, бүгүн ал кыргыз-өзбек мамлекеттик чек арасын делимитациялоо жана демаркациялоо боюнча өкмөттүк делегациянын Өзбекстанга болгон иш-сапарынын жыйынтыгы боюнча маалымат жыйын өткөрдү.
"Чек ара маселеси чечилип жатканда бардык кыргызстандыктын үйү, огороду, үлүш жери толугу менен Кыргызстан тарапка өттү. Эч ким үй-жайынан ажыраган жок", — деди Ташиев.
Буга чейин УКМК төрагасы кыргыз-тажик чек арасы чечилип жатканда, айрым үйлөр бузулуп, жашоочулар башка жакка көчүрүлүшү мүмкүн экенин айткан. Андай шартта "мамлекет аларды талаага калтырбай, мүлкүн ордуна тургузуп берерин" кошумчалаган.