БИШКЕК, 26-мар. — Sputnik. Бишкек шаарында 15-марттан баштап коронавирус жугузгандардын саны көбөйө баштады. Бул тууралуу Бишкек шаардык ооруларды алдын алуу жана мамлекеттик санитардык-эпидемиологиялык көзөмөл бөлүмүнүн башчысы Айнагүл Рыскулбекова билдирди.
Sputnik Кыргызстан агенттигинин мультимедиалык борборунда маалымат жыйын өтүүдө.
Рыскулбекованын айтымында, вирус жуктургандардын саны күн сайын аз-аздан көбөйүп бара жатат.
"Жыл башынан бери борбор калаада 2 940 киши вирус жугузуп алды. Алардын ичинен 1 737 учур ПЦР-тест аркылуу тастыкталган. Ооруп калгандардын басымдуу бөлүгүн, тагыраагы, 58 пайызын 30-64 жаштын ортосундагылар түзөт", — деди адис.
Мындан тышкары, ооруп жаткандардын 21 пайызы 65 жаштан жогорулар, 2,5 пайызы 14 жашка чейинки балдар экени айтылды.