БИШКЕК, 20-мар. — Sputnik. Биринчи вице-премьер Артем Новиков Республикалык штабдын жыйынын өткөрүп, коронавирустан коргонуу иштерин күчөтүү тапшырмасын берди.
Ал эми саламаттык сактоо жана социалдык өнүктүрүү министринин орун басары Нурболот Үсөнбаев массалык иш-чараларга чектөө киргизүүнү, коомдук жайларда бет кап тагуу жана социалдык аралыкты сактоо эрежелерин күчөтүү зарылчылыгын билдирген.
Биринчи вице-премьер Артем Новиков
© Пресс-служба правительства / Алишер Алиев
"Саламаттык сактоо системасынын биринчи звеносу ар бир облустан айыл өкмөттөргө чейин калктын ден соолугуна байкоо салып турушу керек. Эпидемиологиялык кырдаал оорлошуп баратса кошумча чектөөлөрдү киргизүү маселеси каралат. Дары-дармектин кеминде эки айлык запасы сакталып турушу зарыл. Баалары мамлекеттин катуу көзөмөлүндө болот. Кийинки жумада фармацевтикалык бизнестин өкүлдөрү менен жолугам", — деди Новиков.
Ошондой эле ал 1-апрелге чейин бардык медициналык мекемелер кычкылтек берүү системасына кошулуп, ал эми өзүнчө ачылган жана жарым стационардык мекемелерди кычкылтек концентратору менен камсыздоо тапшырмасын берди.