БИШКЕК, 20-мар. — Sputnik. Европа биримдиги Кыргызстан бийлигин ЕККУнун Адам укугу жана демократиялык институттар боюнча бюросу менен Венеция комиссиясынын биргелешип чыгарган бүтүмүн эске алууга чакырат. Бул туурасында ЕБдин КРдеги өкүлчүлүгүнөн кабарлашты.
Андагы бүтүмдө жаңы Баш мыйзамдын долбоорундагы бир катар жоболор бийлик бутактарынын тең салмактуулугуна, андан сырткары, мыйзам үстөмдүгү жана демократия үчүн баалуу болгон жеке эркиндикти сактоого доо кетирет деп айтылган.
ЕБдин билдирүүсүнүн соңунда 11-апрелде алып чыга турган документте "негизги мыйзамды иштеп чыгуу жана кабыл алуу процедурасында олуттуу кемчиликтер кеткендиги" белгиленген. Муну менен катар эле маалымдуулуктун, ар тарапты камтуунун жоктугу жана майда-чүйдөсүнө чейин түшүндүргөн кеңешүүлөр болбогондугу айтылган.
ЕБден жаңы Конституциянын долбоорун кабыл алууда ЕККУнун Адам укугу жана демократиялык институттар боюнча бюросу менен Венеция комиссиясынын биргелешкен билдирүүсүн көңүлгө алуу зарылдыгын эскерткен.
ЕБ Кыргызстандагы реформалоо программаларын алга жылдыруу жана алдыдагы көйгөйлөрдү чечүүгө колдоо көрсөтөрү туурасында кайрадан билдирген.
Эске салсак, 11-апрелдеги референдумда эл Баш мыйзамдын жаңы долбооруна макул же каршыбы деген суроо коюлган. Сунушталып жаткан Баш мыйзамда президенттин ыйгарым укуктары кеңейтилген.