БИШКЕК, 18-мар. — Sputnik. Өлкөдө минералдык жер семирткичтерди экспорттоого убактылуу тыюу салынды. Тийиштүү чечимге премьер-министр Улукбек Марипов кол койгонун өкмөттүн маалымат кызматы билдирди.
Мындай чечим жазгы талаа иштери учурунда өлкөнүн айыл чарба тармагын минералдык жер семирткич менен өз учурунда жана толук көлөмдө камсыздоо, анын баасынын жогорулашына жол бербөө максатында кабыл алынган.
Кыргызстанга жер семирткич негизинен Өзбекстандан алып келинет. Эки өлкөнүн ортосунда минералдык заттарды ташуу жаатында кызматташуу тууралуу 2017-жылы кол коюлган келишим бар.
"Ар жылы берилүүчү квота 100 миң тоннаны түзөт, анын ичинде жазгы талаа жумуштары мезгилине 60 миң тонна, калган 40 миң тонна көлөмүндөгү бөлүгү күз мезгилине туура келет. Мындан тышкары, жер семирткичтин 30-35 пайызы Россия жана Казакстандан алынат", — деп айтылат билдирүүдө.
Жыл сайын жазгы талаа жумуштарын жүргүзүүгө жана республиканын айыл чарба тармагын өз учурунда камсыздоого, республикага күз-кыш мезгилинде 30-40 миң тоннага чейин жер семирткич алып келинет. Себүү иштери башталганга же 1-мартка чейин стратегиялык запас катары 45-50 миң тоннадан кем эмес жер семирткич болушу зарыл. Белгиленген запас камсыздалганда күздүк буудайга кошумча жер семирткич берүү үзгүлтүккө учурабайт.
Айыл, суу чарба жана аймактарды өнүктүрүү министрлигинин, ошондой эле жергиликтүү фермерлердин маалыматы боюнча, акыркы мезгилде республиканын айрым облустарында жер семирткичтин запасын коңшу өлкөлөргө реэкспорттогон көрүнүштөр болгон.
"Мындай окуяларга жол бербөө, минералдык заттардын запасын түзүү жана өлкөнүн азык-түлүк тартыштыгын болтурбай, аларга карата бааны кармап туруу үчүн жер семирткичтерди сыртка сатууга (экспорттоого) тыюу салуу тууралуу чечим кабыл алынды", — деп белгиленет маалыматта.
Аталган тыюу салуу эл аралык транзитти жана кыргыз өкмөтү тарабынан көрсөтүлүүчү гуманитардык көмөктү эсепке албаганда алты айлык мөөнөткө киргизилген.