БИШКЕК, 17-мар. — Sputnik Президент Садыр Жапаров Аксы окуясында курман болгондорду эскерип, "Ала-Тоо" аянтындагы 2002-жылы Аксы окуясында жана 2010-жылы Апрель окуясында элдин эркиндиги үчүн курман болгондордун элесине арналган монументке гүл койду. Бул тууралуу өлкө башчынын маалымат кызматынан билдиришти.
Ошондой эле Жапаров элге кайрылуу жолдоду. Президент Аксы окуялары өлкөбүздүн демократиялык өнүгүү жолундагы бурулуш учур катары тарыхта калганын белгиледи.
"Адилетсиздикке каршы жалпы элдик күрөштүн башаты, Март жана Апрель революцияларына, ошондой эле өткөн жылдын октябрь айындагы элдик толкундоолорго түрткү болгон тарыхый окуя деп бааласак жаңылышпайбыз. Эркиндик жана акыйкаттык үчүн өлүмдөн да коркпогон карапайым аксылыктар ошол күнү кыргыз элинин эр мүнөзүн көрсөтүп, улуттун намысын коргоп калышкан", — деп айтылат президенттин кайрылуусунда.
Өлкө башчы Аксы окуялары учурунда кыргыз эли кландык башкарууга жол бербестигин далилдей алганына токтолду.
"Чындык үчүн күрөшүү — чындыгында аябагандай опурталдуу да, оор да иш экенин мен жакшы түшүнөм. Сиздердин эрдигиңиздер, майтарылбас эркиңер эч качан унутулбайт! Адилеттик, эркиндик деп өмүрүн берген аксылык эр-азаматтар Эркиналы Четимбаевдин, Кадыркул Сапаралиевдин, Медетбек Бекмуратовдун, Сатымбай Үркүнбаевдин, Советбек Тагаевдин, Элдияр Үмөталиевдин эстелигине таазим кылабыз. Аксылыктарды колдоп, Бишкектен ачкачылык жарыялап, каза тапкан Шералы Назаркуловду эскеребиз", — деди Жапаров.
Эске салсак, 2002-жылы дал ушул күнү, 17-мартта, Жогорку Кеңештин депутаты Азимбек Бекназаровдун камалышы боюнча жергиликтүү эл нааразычылык жүрүшүнө чыккан. Аларды токтотуу үчүн Боспиекте тартип коргоо кызматкерлери күч колдонуп, ок чыгарып, анын кесепетинен алты адам каза болуп, бир нечеси ур-токмокко алынган. Бул боюнча тартип коргоо органдары тарабынан атайын "Тайфун" операциясы колдонулган.
Быйыл Аксы окуясына 19 жыл болду.