Эки жыл мурда Кыргызстанда коомдук жайда түкүрүнүп-какырынууга тыюу салган мыйзам кабыл алынган.
Алгач бул үчүн 5 500 сом айып каралган. Башында мыйзам иштегендей болуп жаткан, социалдык тармактын колдонуучулары кээ бир жарандар чака көтөрүп алып, ошого түкүрүнүп жүргөн видеолорду тарата баштаган. Анан эле баары башкача болуп кетти.
Мыйзамды алгачкылардан болуп дал милиция кызматкерлери өздөрү бузуп, түкүрүнүп жатканы элдин көзүнө түштү. Албетте, "ак чөп башта, айыпты токтоосуз төлөйбүз" дегени менен шаардык милиция анын аягы эмне менен бүткөнү боюнча жымыйып унчуккан жок.
Шаар бийлиги юридикалык маселелерден улам айып тарттыруу ИИМге өтө тургандыгын айтышты... Ошентип отуруп баары унутулду. Ал эми коомчулуктун басымдуу бөлүгү "боло берет турбайбы" деп көңүлү жай болду да калды.
Башка мыйзам бузулган учурлар боюнча деле ушундай көрүнүш. Баса, эл өмүр бою мамлекеттик кызматкер болуп жүргөн киши сүт көл, май көл болуп жашаарына таңгалбайт деле. Ал эми мамлекеттик мекемелердин, мыйзамдуулук үчүн күрөшкөн органдардын имараттарынан эшигинин алдында баасы асман чапчыган автоунаалардын токтоп турганына кадыресе эле карап калган.
Жарандар да, анын ичинен мыйзамды өздөрү бузгандар да мындай нерсеге көнүп калгандай. Балакеттин баары ушундан башталып жаткан болуп жүрбөсүн?