БИШКЕК, 14-мар. — Sputnik. Баткен облусунда баңгизат, курал-жарак жана ок-дарылар сакталган жер табылды. Бул туурасында УКМКнын маалымат кызматы кабарлады.
Билдирүүгө ылайык, 11-мартта аталган облустун Баткен районунун аймагында жашырылган жерден мылтыктын 5,45 жана 7,62 миллиметр калибрдеги 37 даана огун, андан тышкары, таңгакталган белгисиз заттар, жалпы салмагы 250 граммдан ашык марихуана, спецификалык жыты бар заттар чыккан.
Бул материалдар Жазык кодексинин 253-беренеси ("Куралды, ок-дарыларды мыйзамсыз жүгүртүү") фактысы боюнча Кылмыштардын жана жоруктардын бирдиктүү реестрине катталган.
Табылган заттар тийиштүү экспертизага жиберилди.
Азыркы учурда УКМК бул ишке тиешеси бар адамдарды аныктоо боюнча иш-чараларды улантып жатат.