БИШКЕК, 12-мар. — Sputnik. Грек-рим күрөшү боюнча Кыргызстандын курама командасынын балбандары Өзбекстанда окуу-машыгуу өткөрүп жатышат. Бул тууралуу Жаштар иши, дене тарбия жана спорт агенттиги билдирди.
Кошуна өлкөнүн Ангрен шаарында 8-мартта старт алган машыгуу 25-мартка чейин уланат.
Иш-чара Спорттун олимпиадалык түрлөрү боюнча дирекциясынын 2021-жылдагы календарлык планына ылайык өтүүдө. Балбандар Азия чемпионатына жана эл аралык лицензиялык мелдештерге даярданышат.
Улуттук команданын башкы машыктыруучусу Азат Эркинбаев жетектеген насаатчылар менен мыкты балбандар Спорттун олимпиадалык түрлөрү боюнча дирекциясы тарабынан жөнөтүлдү. Спорттук иш-чарага катышкан атлеттердин жана машыктыруучулардын тизмеси менен агенттиктин сайтынан таанышсаңыздар болот.