БИШКЕК, 10-мар. — Sputnik. Ош шаарында "Мыкты мугалим — 2021" сынагы старт алды. Анын жеңүүчүлөрүнө батир, автоунаа берилет. Бул тууралуу вице-мэр Эмиль Шадыханов мектеп директорлору жана мугалимдер менен жолугушууда айтканын мэриянын маалымат кызматы билдирди.
Мугалимдерге сынактын шарттары түшүндүрүлүп, жеңүүчүлөр үчүн берилүүчү сыйлыктардын сертификаттары Шаардык билим берүү башкармалыгына тапшырылды.
Мэрия демөөрчүлөр менен биргеликте байгелүү төртүнчүгө чейинки орундарды ээлеген мугалимдерге батир, автоунаа, муздаткыч, компьютер, түстүү принтер, кир жуучу машина, чаң соргуч, үч адамга Ысык-Көлгө эс алуу үчүн жолдомо сыяктуу сыйлыктарды камдаган.
Мындан тышкары, сынакка катышкан мугалимдерге ноутбук, смартфондор дагы берилет.
Сынакка Ош шаарындагы 53 мамлекеттик мектептин мугалимдери катышат.