Кыргызстандык тай бокс чебери Шерзод Кабутов Muay Thai Super Champ мелдешиндеги беттешин нокаут менен утту. Бул тууралуу маалыматты аталган уюм өзүнүн Facebook баракчасына жарыялап, сүрөттөрүн чыгарды.
Уюмдун кезектеги мелдеши 7-мартта өтүп, кыргызстандык атлет таиланддык Жонгардам Цитнумной менен кез келген.
Кабутов биринчи эле раундда айланып ичке тээп, атаандашын бүк түшүрдү. Кубаттуу тепкиден соң кулаган таиланддык мушкер өзүнө келе алган эмес.
Шерзод эсине келе албай жаткан атаандашынын абалын сурап, анын көңүлүн жубатты.
Кыргызстандык мушкер үчүн бул беттеш аталган уюмдун алкагындагы бешинчи кармашы болду. Спортчу анын төртөөсүн утуп, бир жолу жеңилүү ызасын тарткан.