БИШКЕК, 8-мар. — Sputnik. 25-28-март күндөрү борбор калаада муай-тай боюнча Кыргызстандын чемпионаты өткөрүлөт. Бул тууралуу аталган федерация кабарлады.
Мелдеш Бишкектеги Кожомкул атындагы спорт сарайында болот. Катышуучулар 24-марттан баштап турнир бүткөнгө чейинки аралыкта (рингге чыгарга бир күн калганда) ушул жакка келип салмакка түшүп кетиши керек.
Өлкө чемпионаты чоңдор, жаштар, өспүрүмдөр арасында өткөрүлүп, кыздар-балдар катышат. Ар биринде онго чукул салмак каралган.
Жеңүүчүлөр жана байге ээлери медаль жана дипломлор менен сыйланат.
Федерация эпидемиологиялык кырдаалга байланышуу ар бир тайбоксчунун өзүнүн спорттук жабдыктары болушу керектигин белгиледи.