БИШКЕК, 27-фев. — Sputnik. Кыргызстанда КМШ мамлекеттеринин башчыларына аты-жөнү толугу менен окшош болгон бир нече адам жашайт.
Sputnik Кыргызстан агенттигинин кабарчысы жашы жетип, биометрикалык маалыматтарын тапшырган шайлоочулардын тизмесин карап, жыйынтыгында кызыктуу ысымдарды таап чыкты. Белгилей кетсек, булардын атасынын аты гана башкача жазылган.
Мисалы, Чүй облусунун Чүй районунда Владимир Путин аттуу адам катталган. Мындан сырткары, ушул эле облустун Москва районунда Владимир Зеленский деген киши жашайт. Эске салсак, Украинанын президентинин аты-жөнү дал ушундай.
Бишкекте Азербайжан президентинин адашы жашайт. Экөөнүн аты-жөнү тең Ильхам Алиев. Кыргызстанда Казакстандын мурдагы президенти Нурсултан Назарбаев адаштарга бай экени маалым болду. Мындай ысым менен өлкөдө сегиз адам катталган. Анын үчөө Баткенде, үчөө Жалал-Абадда, ал эми экөө Таласта.
Назарбаевге салыштырмалуу Казакстандын азыркы президенти Касым-Жомарт Токаевдин аты-жөнүнө окшош адам КРде жок. Бул жерде кеп биометрикалык маалыматтарын тапшырган кыргызстандыктар тууралуу гана болгонун эске салып кетебиз.