БИШКЕК, 23-фев. — Sputnik. Салык кызматы Бирдиктүү салык декларациясын түн ортосуна чейин кабыл ала баштаганын билдирди.
Салык органдары салык төлөөчүлөргө ар тараптан, толук кандуу жардам көрсөтүү максатында Бирдиктүү салык декларациясын кабыл алуу боюнча атайын режимге өткөнү белгиленди.
1-мартка чейин белгиленген графикке ылайык, аймактык салык органдарынын кызматкерлери алдыдагы жана дем алыш күндөрү да декларацияны түн ортосуна чейин кабыл алышат.
Декларацияны иш убактыларында тапшырууга жетишпей калган салык төлөөчүлөр аны 18:00дөн кийин түнкү саат 24:00гө чейин, ал эми дем алыш күндөрү саат 09.00дөн 24:00гө чейин тапшыруу мүмкүнчүлүгү бар.
1-мартка чейин Бирдиктүү салык декларациясын ата мекендик уюмдар, дыйкан жана фермердик чарбалар, туруктуу мекемесин түзүү менен өлкө аймагында иш жүргүзгөн чет өлкөлүк уюмдар тапшырууга милдеттүү экени эскертилди.
Ошондой эле 1-апрелге чейин мамлекеттик жана муниципалдык кызматкерлер, жеке ишкерлер, анын ичинде патенттик негизде салык төлөгөндөр, менчигинде салык салынуучу кыймылдуу жана кыймылсыз мүлкү жана жер участогу бар жеке жактар салык декларациясын тапшырууга милдеттүү. Андан сырткары, юридикалык жакты түзбөй туруп дыйкан жана фермердик чарбалар менен алектенгендер тапшырышы керек.
Толук маалыматты жергиликтүү салык органдарынан, ошондой эле 116 номурунан же www.sti.gov.kg сайтынан алууга болот.