БИШКЕК, 19-фев. — Sputnik. Кыргызстандын мамлекет башчысы Садыр Жапаров Россия менен эриш-аркак жылынын мөөнөтүн узартууну сунуштаганын президенттин маалымат кызматынан билдиришти.
Бул тууралуу пикирин Садыр Жапаров өзүнүн "Союздук байланыштар. Президент Садыр Жапаров Кыргызстан менен Россиянын байланыштары тууралуу" жөнүндөгү макаласына жазган. Тексти президенттин сайтына жарыяланды.
"Көп улуттуу Кыргызстандын элинин атынан мен эриш-аркак жылынын мөөнөтүн узартууну сунуш кылам. Бул боюнча Россиянын жетекчилигинен колдоо табарыма ишенем", — деди Жапаров.
Ал "2020-жыл — Россия менен Кыргызстандын эриш-аркак жылы" деп жарыяланганы менен пандемияга байланыштуу көпчүлүк иш-чаралар онлайн өтүп калганын белгилеген. Иш-чаранын жабылыш аземи 2021-жылга пландалган болчу.