БИШКЕК, 18-фев. — Sputnik. КРдин Куралдуу күчтөрүнүн мөөнөттөгү аскерлеринин азык-түлүк рационунун жаңы нормасы бекитилди. Бул тууралуу Коргоо министрлиги кабарлады.
КРдин Куралдуу күчтөрүнүн мөөнөттөгү аскерлеринин азык-түлүк рационунун жаңы нормасы бекитилди
© Фото / пресс-служба Министерства обороны КР
Тиешелүү токтом өкмөт тарабынан кабыл алынган.
"Эми жоокерлердин тамак-ашынын рационунда ата мекендик өндүрүүчүлөр тарабынан өндүрүлгөн калориялуу азыктар, мисалы, жарым-жартылай ышталган колбаса, жумуртка, сыр, коюлтулган сүт, табигый жемиш ширеси же жаңы жемиштер болот. Мындан тышкары, эт, балык, кесме жана өсүмдүк майынын суткалык ченеми бир кыйла жогорулайт", — деп айтылат маалыматта.
Аталган норма Коргоо иштери боюнча мамлекеттик комитеттин адистери тарабынан иштелип чыгып, илимий изилдөөлөрдөн соң кабыл алынган.
Азык-түлүктүн жаңы нормасында аскердик кызматтын өзгөчөлүктөрү, жоокерлердин күжүрмөн даярдыгы, күн тартиби, климаттык шарт, ошондой эле улуттук тамактануу өзгөчөлүктөрү дагы эске алынганы белгиленди.