БИШКЕК, 17-фев. — Sputnik. Кыргызстан Ысык-Көлдө Сары-Жаз ГЭС каскадын куруу боюнча сүйлөшүүлөрдү жүргүзүп жатат. Бул тууралуу Улуттук энергохолдингдин төрагасынын кеңешчиси Чоробай Акунов билдирди.
Ал гидроэнергетика боюнча конгрессте сөз сүйлөдү.
"1100 мегаватт кубаттуулуктагы Сары-Жаз ГЭС каскадын куруу боюнча сүйлөшүүлөр жүрүп жатат", — деди Акунов.
Бирок ал сүйлөшүүлөр ким менен кандай шартта жүргүзүлүп жаткандыгын так айткан жок.
Эске салсак, бийлик бул долбоор тууралуу бир нече жыл мурда айткан. 2006-жылы долбоордун техникалык-экономикалык негиздемесин иштеп чыгуу башталгандыгы айтылган. Аталган каскадда өндүрүлгөн электр энергиясы Кытайдын Синьцзянь-Уйгур автономиялуу районуна жеткирилет деп болжолдонгон. 2013-жылы президент Алмазбек Атамбаев Кытайды аталган долбоор менен иштешүүгө чакыруу пландаштырылып жаткандыгын айткан.
Белгилей кетсек, Кыргызстандагы эң ири болуп Токтогул ГЭСи саналып, анын кубаттуулугу 1200 мегаваттка жетет.