БИШКЕК, 15-фев. — Sputnik. Ички иштер министрлиги ротацияны эмне үчүн жүргүзгөнүн түшүндүрүп берди.
Бүгүн Бишкек, Ош шаарларынын, бир катар облустук, райондук ички иштер башкармалыктарынын жана милициянын башка кызматтарынын жетекчилери алмашкан. Алардын тизмесин бул материалдан окуй аласыз.
Ротациянын негизинде ички иштер органдарынын маанилүү кызматтарына кесипкөй жетекчилер дайындалганы белгиленет.
"Кадрдык өзгөрүүлөр башкаруу тутумун өнүктүрүүгө байланыштуу болгондуктан, ички иштер органдарынын ишинин натыйжалуулугун жогорулатууга, сапаттуу кадрдык курамды түзүүгө багытталган. Практикалык иштерге өзгөчө маани берүүгө убакыт келди. Ошондуктан ИИМдин борбордук аппаратынын маанилүү кызматына, облустардын, Бишкек жана Ош шаарынын жетекчилик курамына өз ишинин кесипкөй кызматкерлери дайындалды", — деп айтылат маалыматта.
Ошондой эле ИИМ жаңы дайындалган жетекчилер калыптанып калган кырдаалга жаңыча көз караш менен карап, көйгөйлүү маселелер болсо чечүүнүн жолдорун табат деп ишендирет.