БИШКЕК, 13-фев. — Sputnik. Ош — Бишкек жолунда тоо текени мыйзамсыз атып, этин автоунаага жүктөп жаткан жаран кармалды. Бул маалыматты Биотүрдүүлүктү сактоо жана өзгөчө корголуучу жаратылыш аймактары департаментинин Жалал-Абаддагы өкүлчүлүгүнүн башчысы Туратбек Сатимбаев билдирди.
Анын айтымында, аталган департамент тарабынан 10-февраль күнү атайын рейд өткөрүлгөн. Токтогул районунун Кара-Көл шаарына жакын жердеги Беке-Чал жайлоосуна кеткен жолдун бурулушунда жол четинде автоунаага белгисиз буюм жүктөп жаткан адам шек жараткан.
Ош — Бишкек жолунда тоо текени мыйзамсыз атып, этин автоунаага жүктөп жаткан жаран кармалды
© Фото / Зульфия Тургунова
Тоо текенин башын автоунаага салып жаткан кишини сураштыра келгенде, ал Аксы районунун 26 жаштагы Т. уулу Р. аттуу тургуну экени аныкталган. Анын Беке-Чал аймагындагы кыштоодо мал бага турганы белгилүү болгон. Ал эми жанындагы жолдошу аталган департаменттин кызматкерлерин көрөр замат изин жашырган.
Тоо текенин эти менен кармалган 26 жаштагы жигит Кара-Көл шаардык ички иштер башкармалыгына өткөрүлүп берилип, Кылмыш жана жоруктардын бирдиктүү реестрине катталган. Жанындагы жолдошу Кара-Көл шаарынын тургуну экендиги аныкталган.
"Шектүү сурак учурунда ал жолдошу тоо текени аткандыгын жана этин автоунаага чейин жеткирип коюуну сурангандыгын айтып берди", — деген Сатимбаев.
Бул иш боюнча топтолгон материалдар Кара-Көл ШИИБге мамлекетке 100 миң сом өндүрүү үчүн өткөрүлүп берилген.