Көндүмдөрдү өнүктүрүү фонду Азия өнүктүрүү банкынын эл аралык долбоорунун алкагында 2016-жылдын аягында түзүлгөн. Максаты — кыска убакыттын ичинде жумушчуларды окутуу жана квалификациясын жогорулатуу менен иш берүүчүлөргө жардам берүү. Бул тууралуу Бакыт Кыдыралиев Sputnik Кыргызстан радиосунун эфиринде маек куруп жатып билдирди.
Анын айтымында, 16-63 жашка чейинки бардык каалоочулар катталган жерине карабастан курстарга катыша алат.
"Төрт жыл аралыгында кыска мөөнөттүү курстардан 22 794 адам өттү. Алардын ичинде өлкөнүн бардык аймактарында жашаган мүмкүнчүлүгү чектелген 780 адам бар. Окугандардын 55 пайызы жумуш берүүчүлөрдүн талабы менен, ал эми 45 пайызы өзү каалаган кесиби боюнча окутулду. Курстарга катышкандар 97 пайызды түзсө, алардын 75 пайызы жумушка орношту. Билим алуучулардын 47 пайызы аялдар. Бүгүнкү күндө көндүмдөрдү өнүктүрүү фонду баштапкы кесиптик билим берүү агенттиги менен биргеликте өлкөнүн бардык аймактарындагы 99 билим берүү мекемелери менен кызматташып, 30дан ашуун суроо-талапка ээ кесип боюнча билим берип жатат. Курстун катышуучуларына кесиптик лицейлердин мугалимдери негизги жумушунан убакыт бөлүп, билим берет. Ар бир группада 12ден адам болууга тийиш. Курстар мурда акысыз жүргүзүлчү, бул жолу катышуучулар окуу материалдары үчүн каражат төлөйт", — деди Кыдыралиев.
Ал курска катышуу үчүн окуй турган аймактагы башкы кеңсеге барып катталуу жетиштүү экенин, кененирээк маалыматты kesip.kg сайтынан алса болорун кошумчалады.