БИШКЕК, 10-фев. — Sputnik. Бишкекте Ички иштер министрлигинин Баңгизатты мыйзамсыз жүгүртүүгө каршы кызматы наркотик саткан интернет дүкөндү жапты. Бул тууралуу ИИМден билдиришти.
Маалыматка караганда, атайын операциянын алкагында баңгизатын онлайн сатууга шектелген А.С. аттуу 37 жаштагы Бишкек шаарынын тургуну кармалган.
"Кылмышкер интернет дүкөнү аркылуу товардын аталышын, салмагын, баасын жарыялап турган. Сатып алуучу менен сатуучу жолукчу эмес. Алар тек гана интернет аркылуу байланышта болушкан. А.С. товарды саткандан кийин аларды короолордогу таштанды челектерге, урналарга таштап кетип турган. Ал эми сатып алуучу каражатты электрондук капчыктарга, банктык картага которуп турган. Шектүү акчаны жеке керектөөсү үчүн сарптаганы белгилүү болду", — деп айтылат маалыматта.
Жарандын үйүн тинтүү учурунда баңгизатын өстүрүүгө ылайыкталган жабдыктар, рация, компьютер табылган.
А.С. изин жашыруу үчүн ар дайым эски аккаунттарын өчүрүп, жаңыларын ачып турган. Сотко чейинки тергөө амалдарынын алкагында соттук-химиялык, программалык-техникалык, техникалык-криминалдык экспертиза дайындалды. Учурда кылмышка тийиштиги бар башка тараптар дагы изделип жатат.