БИШКЕК, 9-фев. — Sputnik. Бишкекте "Кыш жаңырыгы" аттуу эл аралык онлайн-фестивалдын жеңүүчүлөрү аныкталды. Бул тууралуу Sputnik Кыргызстан агенттигинин кабарчысына иш-чаранын уюштуруучулары кабарлады.
Уюштуруучулардын бири, "ТМЖ" коомдук фондунун жетекчиси Мира Токтогонова быйылкы иш-чаранын программасы эпидемиологиялык кырдаалдан улам өзгөртүлгөнүн, бирок ага карабай кызыккандар көп болгонун белгиледи.
"Фольклордук сынакта 19 мамлекеттин өкүлү ат салышты, ал эми кол өнөрчүлөр сынагында 13 өлкөдөн катышты. Натыйжада Румыния, Азербайжан, Македония жана алыскы Иран мамлекеттеринин өкүлдөрү байгелүү орундарга ээ болушту. Кыргызстандык улан-кыздарыбыз дагы кызыктыруучу сыйлык алышты", — деди Токтогонова.
Ошондой эле ал катышуучулардын эмгектерин эл аралык калыстар баалаганын белгиледи.