БИШКЕК, 6-фев. — Sputnik. Дүйнө боюнча коронавирустун таралуу темпи азайып бара жатат. Бул тууралуу Дүйнөлүк саламаттык сактоо уюмунун эксперти Мария ван Керкховен брифингде билдиргендигин РИА Новости жазды.
"Бул жакшы учур, айтылып жаткан фактыны бекемдеш үчүн бир катар мамлекеттерде аларды (оору жуккан учурларды — ред.) байкоого алып жатабыз", — деген эксперт.
ДССУ адисинин айтымына караганда, бул ириде вирустун жайылуу чынжырчасын үзгөн аракеттерден улам жаралды. Ал эми коронавируска каршы турган "болуп көрбөгөндөй кубаттуу курал" катары вакцинаны атаган.
Анткен менен Керкховен COVID-19 чыккан учурлар азайган өлкөлөрдү пандемия менен күрөшүү чараларын катуу сактоого чакырды.
Буга чейин ДССУнун башкы директору Тедрос Адханом Гебрейесус COVID-19 менен ооругандарга караганда ага каршы вакцина алгандардын саны көп болгондугун кабарлаган.
"Дүйнөдө инфекцияны жуктуруп ооругандардан вакцина алгандардын саны ашты. Бир жагынан алганда бул жакшы жаңылык жана кыска мөөнөттөгү эң сонун жетишкендик. Бирок эмдөөнүн төрттөн үчү 60 пайызы дээрлик глобалдык ИДПга чогулган 10 өлкөгө туура келет", — деп айткан ал брифингде.
Гебрейесус 130 өлкө 2,5 миллиард калкы менен азырынча вакцинанын биринчи дагы дозасын ала электигин айтып, вакцина чыгарган мамлекеттерди чабалыраак болуп жаткандарга жардам берип, көмөктөшүүгө чакырган.
Анткен менен окумуштуулар, анын ичинен Дүйнөлүк саламаттык сактоо уюму адамзат алдыда дагы узак жылдар бою пандемия менен күрөшөрүн тыкыр эскертип келет.