БИШКЕК, 5-фев. — Sputnik. Кыргызстандын премьер-министри Улукбек Марипов Евразия экономикалык бирикмесине кирген өлкөлөрдүн өкмөт башчылары менен сүйлөшүп жатып, авиакаттамдардын санын көбөйтүү маселесин койду.
Марипов Алматы шаарында өтүп жаткан Евразия өкмөттөр аралык кеңешинин отурумунда башка өлкөлөргө каттоо боюнча чектөөлөр мигранттарга бир топ көйгөй жаратып жатканын айтты.
"Учурда зарыл болгон өлкөлөргө жетиштүү өлчөмдө жумушчу күчтөрдү алып баруу жана мигранттарды кызмат ордуна кайтаруу үчүн чектөөлөрдү жоюу, ошондой эле аба каттамдарынын санын көбөйтүү маселеси турат", — деди Марипов.
Мындан тышкары, ал орун которуу эркиндигин камсыздоо үчүн ЕАЭБдин алкагында санариптик мейкиндик түзүү зарылдыгын белгиледи.