БИШКЕК, 4-фев. — Sputnik. Ош — Бишкек унаа жолунда күйүүчү май ташыган автоунаа өрттөндү. Бул тууралуу ӨКМдин маалымат кызматы кабарлады.
Куткаруучуларга кечээ, 3-февраль күнү, саат 17.15те Сузак районунун Топурак-Бел аймагында, Ош — Бишкек унаа жолунун 562-чакырымында оор жүк ташуучу унаа күйүп жатат деген маалымат түшкөн.
ӨКМ кызматкерлери окуя болгон жерге 15 мүнөттө барышкан. Бензовоздун кабинасындагы өрт цистерна жагына өтүп кетпеш үчүн ыкчам аракеттер көрүлүп, толугу менен 17:59да өчүрүлгөн. Натыйжада 37 тонна АИ-92 бензини сакталып калган.
Учурда өрттүн келип чыгуу себептери жана келтирилген материалдык зыян такталууда.