БИШКЕК, 3-фев. — Sputnik. "Токмоктук Граф" деген ат менен белгилүү болгон миллиардер Алиджан Ибрагимов Бельгияда каза болду. Бул тууралуу Sputnik Казакстан ал акционер болуп жүргөн Eurasian Resources Group компаниясынын маалымат кызматына таянып кабарлады.
Алдын ала маалыматтар боюнча, ишкер Бельгияда коронавирустан көз жумган. Ал 66 жашта болчу.
Ибрагимов COVID-19ду Казакстанда жүргөндө жуктуруп алып, абал начарлап кеткенден кийин Бельгияга дарыланууга кетип, ошол жактан көз жумгандыгы айтылды.
Ибрагимов 1953-жылы Өзбекстанда Фергана облусунда туулуп, бирок Чүй аймагына караштуу Токмок шаарында жашап келген. Ишкерлигин Казакстанда жүргүзгөн. Ал Eurasian Resources Group (ERG) ири компаниясынын теңтөрагасы болгон. Бул ишкана жаратылыш ресурстарын казып жана кайра иштетүү менен алектенген.
2019-жылы Алиджан Ибрагимов планетадагы эң бай адамдардын катарын толуктаган. Анда мүлкүнүн наркы 2,3 миллиард долларды чапчыган. Байлардын тизмесинде ал 1008-орунда турган.