БИШКЕК, 29-янв. — Sputnik. Алайда милиция кызматкерин өлтүрүүгө шектүүлөр кармалды. Бул тууралуу Ош облустук ички иштер башкармалыгынын маалымат катчысы Жеңиш Аширбаев Sputnik Кыргызстан агенттигине билдирди.
Маалыматка ылайык, кечээ, 28-январь күнү, саат 16:30дар чамасында Алай РИИБинин нөөмөт бөлүмүнө Кыркол айылындагы Гүлчө дарыясында жашы 30-35тердеги жарандын сөөгү табылгандыгы боюнча маалымат түшкөн.
ӨКМ кызматкерлеринин жардамы менен суудан алып чыккан учурда ал Алай РИИБинин 32 жаштагы аймактык инспектору Э.Н. экендиги аныкталган.
"Сөөктү карап чыкканда башынын арткы тарабында, оң кулагынын үстүндө, оң колунда жана бел тарабында жарааттары бар экендиги байкалып, киши колдуу болгону аныкталган. Көп узабай Ош ОИИБдин жана Алай РИИБдин кызматкерлери тарабынан кылмышка шектүүлөр кармалды", — деп айтылат билдирүүдө.
Алар Алай районунун Будалык айылынын 54, 32 жана 31 жаштагы тургундары болуп чыкты. 31 жаштагы шектүү мурда Россияда каракчылык боюнча соттолгону белгилүү болду.
Милициядан билдиришкендей, маркум 27-январь күнү 21:00гө чейин жумушта болгон.
"Андан соң достору менен туулган күнгө барган. Ал жерде ага чейин эле спирт ичимдиктерин ичип, мас болуп калган адамдар ортосунда мушташ чыгып кетет. Натыйжада ичип алган кишилер милиция кызматкерин сабап, Э.Н. алган жараатынан окуя болгон жерде каза тапкан. Кийин шектүүлөр кылмыш изин жашыруу максатында сөөктү автоунаага салып келишип, сууга агызып жиберишкен", — деп айтылат милициянын маалыматында.
Бул факт боюнча КР Жазык кодексинин 130-беренесине ("Киши өлтүрүү") ылайык сотко чейинки өндүрүш иши ачылып, тергөө жүрүп жатат.