БИШКЕК, 27-янв. — Sputnik. 2019-жылы кабыл алынган борбор калаанын ичиндеги курулуштун майда-чүйдөсүнө чейин каралган долбоору жокко чыгарылды. Бул тууралуу деталдуу планга каршы тараптардын адвокаты Эрик Ирискулбеков билдирди.
Бишкек шаардык административдик соту "2019-жылы калаанын деталдуу планы мыйзамсыз кабыл алынган" деп тапкан.
Буга чейин шаардыктар Бишкектин деталдуу планын жокко чыгарууну талап кылып митингге чыгышкан. Андан соң мэрдин милдетин аткаруучу Балбак Түлөбаев Бишкек шаардык кеңешке техникалык документти артка кайтаруу боюнча кат жолдой турганын билдирген.
Шаар ичиндеги курулуштун майда-чүйдөсүнө чейин каралган долбоору — бул башкы пландын кененирээк версиясы. Башкача айтканда, аталган документ кварталдарды, участкаларды курууда жана архитектуралык долбоорлоодо колдонулат.