БИШКЕК, 16-янв. — Sputnik. Ысык-Көл облусунун Ак-Суу районуна караштуу Теплоключенка айылында акысыз юридикалык жардам көрсөтүү борбору ачылды. Бул туурасында Юстиция министрлигинин маалымат кызматы кабарлады.
Ал Европа биримдигинин КРдеги өкүлчүлүгүнүн каржылоосу менен ачылганы айтылат.
Ачылыш аземине юстиция министри Марат Жаманкулов жана башка бийлик өкүлдөрү катышкан. Министр ушуну менен өлкөдө 30 акысыз юридикалык жардам көрсөтүү борбору ишке киргизилгенин билдирген. Ошондой эле аймактарда ачуу мезгилдин талабы экенин айткан.
Аталган борбордо акысыз юридикалык жардам жана маалымат түрүндө юридикалык маселелер боюнча оозеки консультацияларды берүү, аны менен бирге документтердин долбоорун түзүүгө көмөк көрсөтүлөт.
Буга чейин Бишкек, Ош, Токмок, Кант, Кара-Балта, Каракол, Чолпон-Ата, Балыкчы, Кара-Суу, Ноокат, Жалал-Абад, Кербен, Кара-Көл, Баткен, Исфана, Кадамжай, Талас жана Нарын шаарларында, ошондой эле Беловодск, Кара-Кулжа, Гүлчө, Араван, Дароот-Коргон, Базар-Коргон, Кочкор, Сокулук, Өзгөн жана Кемин айылдарында ачылган. Толук даректери менен Юстиция министрлигинин сайтынан билүүгө болот.