БИШКЕК, 15-янв. — Sputnik. Кыргызстандын калкына мөөнөтү өткөн азык-түлүктөрдү чет өлкөдөн алып келүү жана сатууда коррупциялык схема аныкталды. Бул туурасында Башкы прокуратуранын маалымат кызматы кабарлады.
Ишканалардын кеңсесине жана кампаларына тинтүү жүргүзүлгөндө ири көлөмдөгү мөөнөтү бүткөн азыктар, жасалма этикеткалар жана аны чыгарган жабдуулар табылган.
Бул иш боюнча Жазык кодексинин 319-беренеси ("Коррупция") менен компаниялардын эки жооптуу кызматкери кармалып, Бишкек ШИИБдин убактылуу кармоочу жайына киргизилген.
Кылмыштын башка фигуранттары жана аларды калкалаган мамлекеттик, фискалдык, укук коргоо органдарынын кызматкерлери такталууда.