БИШКЕК, 12-янв. — Sputnik. Ош облусунун Өзгөн шаарындагы жеке менчик клиниканын имараты өрттөнүп, бир киши жабыркаган. Бул тууралуу ӨКМдин маалымат кызматынан кабаралашты.
Тилсиз жоо аталган имаратта болжол менен кечки саат алтыларда башталган.
"Өзгөн шаарынын Манас көчөсүндө жайгашкан менчик клиниканын имаратынан чыккан өрттүн кесепетинен 75 жаштагы киши күйүк алып ооруканага жаткырылган, абалы туруктуу. Мындан сырткары, өрт чыккан жерден 11 адам эвакуацияланган", — деп айтылган маалыматта.
Өрттү өчүрүүгө үч бригада тартылган. ӨКМ кызматкерлери тилсиз жоо менен төрт саатка жакын күрөшкөн.