БИШКЕК, 11-янв. — Sputnik. Япониянын жогорку лигасындагы "Иокогама" футболдук клубу өзүнүн 54 жаштагы оюнчусу Кадзуёси Миура менен келишимин узартты. Бул тууралуу клубдун расмий сайтына жарыяланганын Р-Спорт жазды.
Япония курама командасынын мурдагы чабуулчусу менен команданын ортосундагы келишим бир сезонго түзүлгөн. Ал оюнчунун профессионалдык карьерасында 36-сезону болот.
"Өткөн сезондо коронавирустун айынан дүйнө жүзү оор абалга туш болгон. Бирок кайдыгер эмес элдин аракети менен биз кайрадан футбол ойноп жатабыз. Жеке мен бул сезондо толук кандуу ойной алган эмесмин, менин амбициям жана оюнга болгон каалоом дагы да өстү. Дайыма башкы курамда оюндарга чыгып, команданын жеңишине салым кошуу үчүн мен мындан ары дагы күн сайын талыкпай эмгектенем", — деген ал.
Кадзуёси Миура өткөн жылдын сентябрында 54 жашка караган куракта расмий оюнга чыгып, лиганын тарыхында эң улуу футболчу болуп рекорд жараткан.
Кадзуёси Миура "Иокогама" командасынын намысын 2005-жылдан бери коргоп келет. Буга чейин ал япониялык "Виссел Кобе", "Киото Санга", "Верди Кавасаки" (учурда "Токио Верди"), италиялык "Женоа", загребдик "Динамо", Австралиянын "Сидней" командаларында ойногон.
Футболдук карьерасын 1986-жылы Бразилиянын "Сантос" клубунда баштап, кийин бразилиялык "Коритиба", "Палмейрас" жана башка бир канча командаларынын намысын коргогон.
Япония курама командасынын сабында 89 оюн ойноп, 55 гол киргизген. 1992-жылы Азия кубогу мелдешин уткан.