БИШКЕК, 9-янв. — Sputnik. Россиялыктардын дээрлик 15 пайызы "Коомдук пикир" фонду жүргүзгөн сурамжылоодо ааламдагы башка күчтөр менен байланышта экенин айтышкан. Бул тууралуу РИА Новости жазды.
Ал эми Ipsos сурамжылоо компаниясынын маалыматы боюнча, америкалыктардын 46 пайызы "арбактарга" ишенишет. Адистердин айтымында, алтынчы сезим ар дайым эле оорулуу адамдардын галлюцинациясы эмес.
Дүйнөлүк ЖМКлар билдиргендей, COVID-19 илдетинин биринчи толкуну учурунда Ява аралындагы Кепух аймагын ак халатчан "арбактар" басып алган. Чынында бул жергиликтүү бийликтин тургундарды кечинде үйдөн чыкпай отурууга жасаган чарасы болгон. Ыктыярчылар ак халаттарды оронуп алып "көрүмчү" же "арбактын" кейпинде тургундарды коркутушкан. Жыйынтыгында тургундар "көрүмчүлөрдөн" чочулап үйдөн көп чыкпай калышкан.
Изилдөөчүлөр белгилешкендей, башка дүйнөгө жана өлгөндөрдүн рухтарына болгон ишеним адамдын курчап турган дүйнө жөнүндө түшүнүгүндө терең тамырлаган.
Көрүү жана угуу галлюцинациялары көбүнчө психикалык жактан жабыркагандарга байланыштуу. Мисалы, Паркинсон сыяктуу нерв оорулары менен жабыркаган бейтаптардын 88 пайызында көрүү, 45 пайызында угуу иллюзиясы бар. Бирок бул дени сак адамдарда да кездешерин Ньюкасл университетинин кызматкери Дэвид Смайлз жетектеген экспериментте аныкталган.
Окумуштуулар сырдуу деген үйлөрдө арбактар менен жолуккан адамдардагы түшүнүксүз кубулуштардын эки түрүн аныкташкан. Биринчиси — бөлмөдөгү жыттар, дубалдардын көлөкөлөрү, музыка. Экинчиси — начар жарык. Бөлмөлөрдөгү караңгылык кандайдыр бир мистикалык маанайды жаратышы мүмкүн.
Бирок илимий түшүндүрмөлөргө карабастан, айрымдар иллюзияга көбүрөөк ишенип, тазалануу жөрөлгөсүн өткөрө беришери белгиленди.