БИШКЕК, 5-янв. — Sputnik. Кыргызстандын калкынын басымдуу бөлүгү коронавирус менен ооруп айыкты. Бул тууралуу саламаттык сактоо министри Алымкадыр Бейшеналиев брифинг учурунда билдирди.
Анын айтымында, ноябрдын ортосунан баштап коронавирус жуктурган учурлардын саны төмөндөгөн.
"Калктын көбү коронавирус менен ооруп айыккандыктан, ооруган учурлардын саны аз катталып жатышы ыктымал. Муну ИФА-тесттердин жыйынтыгы тастыктоодо", — деди министр.
Бейшеналиевдин божомолунда, вирус жуктурган учурлардын азайышына аралыктан окуу, массалык иш-чараларга коюлган чектөө себеп болушу ыктымал.
Министр коронавирустан сактануу үчүн коргонуу эрежелерин аткарууну уланта берүүгө чакырып кеткен.
Белгилей кетсек, 5-январга карата өлкөдө 124 кишиден коронавирус табылып, жалпы жуктурган учурлардын саны 81 512ге жетти. Анын ичинен 76 955 бейтап ооруну жеңген. Бир сутка ичинде өлүм учуру катталган жок.