Уулунан ажырап Базарбайдан өч алганы келгенде... "Акбаранын көз жашы" сүрөттө

Бул ирет белгилүү режиссёр Дооронбек Садырбаевдин залкар жазуучу Чыңгыз Айтматовдун "Кыямат" романынын негизинде тарткан "Акбаранын көз жашы" фильмине кайрылдык.

Кинокартина негизинен Алайдагы Жошолу тоолорунда жана Казакстандын талааларында тартылып, анын сценарийин Дооронбек Садырбаев жазып, операторлук кызматты Евгений Барышников менен Айбек Жангазиев аткарган.

Фильмде адам, жаратылыш, жапайы жаныбарлар бири-бири менен тыгыз байланышканын, эгер жер бетинде жашагандар айлана-чөйрөгө, аны байырлаган жандыктарга аяр мамиле кылбаса, аягы каргаша менен бүтө тургандыгы баяндалат. Киночулар ал маселени ачып берүү үчүн жайлоодо мал баккан Бостон менен Базарбайдын жашоо-турмушун, ортодогу мамилесин жана жашоого болгон көз караштарын ортого салган. Кинофильмде колдонулган Акбара жана Ташчайнар деп аталган эки карышкырды атайын Россиядан алып келишип, кичинекей баланын ролун аткара турган бир жарым жаштагы чүрпөнү узак убакыт издешкен.

Кинокартинада Советбек Жумадылов, Рахиля Машурова, Жамал Сейдакматова, Дүйшөн Байдөбөтов, Арсен Өмүралиев, Назира Мамбетова, Альгимантас Видугирис, Бусурман Одуракаев, Турсун Уралиев өз ролдорун ийине жеткире аткарган.

Дооронбек Садырбаевдин эмгеги Чыңгыз Айтматовдун 60 жылдыгына карата тартылып, ага жарым жылдай убакыт жана 300 миң рублге чукул каражат кеткен. Кийин Ош, Фрунзе, Москвадагы кинотеатрларда көрсөтүлүп, залда бош орун калган эмес дешет.