Баткендин башчысы шарты катаал "Тамдыктын" чек арачыларын куттуктап келди

Өкүл алдыда чек ара заставаларын материалдык-техникалык жактан жабдуу, чек арачылардын жашоо шартын жакшыртуу боюнча жигердүү иш-аракеттер жасаларын убадалаган.
Sputnik

БИШКЕК, 31-дек. — Sputnik. Өкмөттүн Баткендеги ыйгарым укуктуу өкүлү Жаныбек Жалалов, облустун эң алыста, Тажикстан менен чектешкен "Тамдык" чек ара заставасынын чек арачыларын жаңы жыл майрамы менен жеринен барып куттуктады. Бул тууралуу өкүлчүлүктүн маалымат кызматы билдирди.

Жалалов мындагы чек арачылардын мекендин тынчтыгы, коопсуздугу үчүн, шарты катаал аймакта кызмат өтөп жатканынын өзү чоң эрдик экенин белгилеп, белектерди берди.

"Бул аймактын кооптуулугун эске алсак, өз өмүрүңөрдү, ден соолугуңарды аябай, ыйык милдетиңерди чыдамкайлык менен аткарып, чек араны бекем коргоп турасыңар. Бул үчүн өзүмдүн жана жалпы облус элинин атынан силерге терең ыраазычылык билдирем. Силердин күжүрмөн аракетиңер менен бүгүн ар бир үй-бүлө бактылуу", — деген өкмөттүн өкүлү.

Бул күнү ыйгарым укуктуу өкүл ошондой эле Баткен районунун Ак-Сай айылындагы Ак-Сай постунда турган чек арачыларды да куттуктап, белектерин тапшырды. Ак-Сай посту Кыргызстан менен Тажикстандын чек арасында, чыр чатак көп катталган аймакта жайгашкан.

Ыйгарым укуктуу өкүл заставанын жана посттун шарттары менен да таанышып чыгып, алдыда аларды материалдык-техникалык жактан жабдуу, чек арачылардын ыңгайлуу шартта жашоосун камсыз кылуу боюнча жигердүү иш-аракеттер жасалаарын белгиледи.