БИШКЕК, 24-дек. — Sputnik. Бажы кызматынын башчысынын мурдагы орун басары Райым Матраимов төккөн эки миллиард сом айып пулдун баары Республикалык бюджеттин киреше бөлүгүндө көрсөтүлөт. Бул тууралуу финансы министринин орун басары Улукбек Кармышаков билдирди.
Ал Sputnik Кыргызстандын маалымат борборунда өткөн брифингде катышып жатып айтты.
Анын айтымында, 22-декабрга карата Матраимов тарабынан 1 миллиард 223 миллион сом которулган.
"Жалпысынан коомдук депозиттик эсепке 1 миллиард 353 миллион сом түшкөн. Матраимовдон тышкары башка жеке жана юридикалык жактардан каражаттар которулган. Бул каражаттар Республикалык бюджеттин киреше бөлүгүндө көрсөтүлүп, андан социалдык жана башка чыгымдар жабылат", — деген министрдин орун басары.
Башкача айтканда, каражат өкмөттүн милдеттенмелерин, биринчи кезекте, социалдык жөлөк пулдарды төлөөгө жумшалат деп кошумчалады ал.
Ал арада маалымат жыйынын берип жаткан УКМКнын төрагасы Камчыбек Ташиев Матраимов мамлекетке келтирилген эки миллиард сом чыгымдын баарын өлкө казынасына толук төккөнүн белгиледи. Айып пулдун 1,4 миллиардын накталай акча менен төгүп, калган 600 миллионун кыймылсыз мүлк иретинде (соода борбору жана 9 батир) төлөгөн.
Эскерте кетсек, УКМК Бажы кызматынын башчысынын мурдагы орун басары Райым Матраимовду коррупцияга шектеп колго түшүргөнүн айткан. Шектүү тергөө менен кызматташууга даяр экенин билдирип, мамлекетке келтирген эки миллиард сом чыгымды ноябрь айынын аягына чейин төлөп берүүгө убада кылган. Матраимов акчаны айтылган мөөнөттө кайтара алган эмес.
УКМК бажыдагы коррупциялык схемага 40 кишинин тиешеси бар экени аныкталганын билдирген.