Конкурс ушул жекшембиде Франциянын батышындагы Вандея департаментинде өттү. Өлкөнүн эң сулуусу наамы үчүн ар кайсы региондордон 18-24 жаштагы 29 талапкер ат салышкан.
Иш-чара салтка ылайык декабрда өтүп, жеңүүчүгө титул келерки жыл үчүн ыйгарылат. Бул жолу эпидемиологиялык чектөөлөрдөн улам залда көрүүчүлөр болгон жок. Катышуучулар алгач көйнөкчөн, андан кийин купальникчен басышты.
Быйылкы жылы конкурстун уюшулганына 100 жыл болду. Иш-чара алгачкы ирет 1920-жылы өткөнү менен бул конкурс эсеп боюнча 91-болду. 1922–1926 жана 1941–1946-жылдары жарыш өтпөй калган.
Жүз жылдыкка байланыштуу калыстар тобуна жалаң гана "Франция сулуусу" титулун уткандар чакырылган. Деген менен жеңүүчүнү көрүүчүлөрдүн добуш берүүсү менен аныкташкан.
Эң сулуу айым деп нормандиялык Амандин Пети табылган. Эми ал "Дүйнө сулуусу" жана "Аалам сулуусу" конкурстарында Франциянын намысын коргоп чыгат.
Амандин Пети геронтология тармагында билим алат.