БИШКЕК, 21-дек. – Sputnik. Улуу Британияда коронавирустун жаңы тиби боюнча кырдаал көзөмөлдөн чыкканын саламаттык сактоо министри Мэтт Хэнкок билдиргенин Sky News жазды.
14-декабрда Хэнкок өлкөдө коронавирустун жаңы штаммы пайда болгонун айтып, ал азыркыдан дагы тез тарай турганын билдирген. Кийинчерээк адистер дагы вирустун жаңы тиби адамдан адамга тез жуга турганын эске салган. Анткен менен илдеттин коркунучу азыркыга караганда жогору экенин тастыктаган далилдер жок. Ошондой эле мутацияланган вирус вакцинага кандай таасир этери дагы аныктала элек.
Бүгүн, 21-декабрда, Хэнкок британиялыктар өздөрүн вирус жуктуруп алгандай эле алып жүрүшү керектигин айтты.
"Бардыгыбыз Рождествону күтүп жатабыз. Бирок COVID-19дун жаңы түрү өтө тездик менен тарап жатат. Буга байланыштуу өкмөт чечкиндүү кадамдарга барууга аргасыз", — деди Хэнкок.
Анын божомолунда илдеттин жайылып кетишин алдын алууга багытталган катуу чаралар вакцина келмейин сакталат.
Британиянын Саламаттык сактоо министрлиги жаңы SARS-CoV-2 азыркыга салыштырмалуу тез тарап, анын очогу Лондон болуп жатканын кабарлады. Ал эми өлкө өкмөтүнүн жетекчиси Борис Жонсон штамм 70 пайызга жугуштуу экенин жар салды.
Европа биримдигине кирген 14 мамлекет коронавирустун жаңы тибине байланыштуу Улуу Британия менен транспорттук каттамдарды чектеп же такыр эле токтотуп салуу чечимин кабыл алышты. Нидерланддар, Бельгия, Италия, Германия, Болгария, Ирландия, Литва, Латвия жана Финляндия аба каттамдарын токтотушту. Франция болсо Улуу Британия менен бардык транспорттук каттамдарды 48 саатка токтотту. Швеция Улуу Британиядан келгендерди өлкөгө киргизбей жатат. Греция жети күндүк, Кипр эки жумалык карантин киргизсе, Испания текшерүү иштерин күчөттү.
Британия менен аба каттамдарын Түркия, Швейцария, Канада жана Аргентина дагы токтотту. Сауд Аравия чек арасын толук жаап, эл аралык аба каттамдарды кабыл албай жатат. Россиялык ыкчам штаб Улуу Британиядагы кырдаалга көз салып жатат, чечимдер тууралуу кошумча маалымат берилет.
Дүйнөлүк саламаттык сактоо уюму Улуу Британиядагы коронавирустун жаңы штаммын изилдеп жатканы айтылууда.
Окумуштуулардын пикири
Илимпоздордун баамында, жаңы штамм тез жукканы менен өтө кооптуу эмес. Коронавирус айына жок дегенде эки ирет мутация болот. Аларга адам өлүмү пайдалуу эместигин Казакстандын профилактикалык медицина академиясынын президенти Алмаз Шарман билдирди.
"Вирус — жаратылышы боюнча паразит. Алар сыртта жашай албайт. Адам көз жумса вирус дагы жок болот. Ошондуктан вирус үчүн ээсинин өлүп калышы пайдалуу эмес. Вирус жашап кетүү үчүн мутация болуп турат. Бул нормалдуу эволюциялык процесс", — деди профессор.
Алмаз Шарман коронавирус дайыма мутацияланып турарын жана бара-бара ал сезондук инфекцияга айланарын билдирип, вакцина бул процессти тездетерин кошумчалады.